É o momento da responsabilidade

Este mércores arrancou a XI Lexislatura coa constitución das dúas Cámaras: o Congreso e o Senado. Foi un inicio de lexislatura atípico, marcado polo espectáculo que promoveron algúns deixando de lado o rigor e a seriedade. Uns saudaron co puño en alto e xuraron a Constitución para cambiala; outros ata a “república catalá” e os galegos de En Marea acabaron o seu discurso en portugués. É, na miña opinión, a escenificación patética do que se fai chamar a nova política, que entra ridiculizando a Lei nas mesmas Cámaras nas que se redactan os textos lexislativos e que pretende convertelas en platós de televisión. Ante este esperpento só cabe recuperar a sensatez que moitos nunca perdemos. Fai falta máis ca nunca un gran pacto de Estado que ofreza estabilidade. É o momento da responsabilidade, a altura de miras e o sentido de Estado. Hai que pór a vista en Europa, os grandes partidos españois deben seguir os exemplos das grandes democracias europeas; Alemaña e Francia amósannos o sentido de Estado das súas forzas políticas en momentos de dificultade. Os cidadáns españois non se merecen coalicións oportunistas con partidos extremistas nin independentistas que poñan en risco todo o que logramos en 37 anos de democracia. Pedro Sánchez abdicou dos principios xerais do PSOE para ser presidente do Goberno, pactou no Senado cos que queren romper España; permitiu que Esquerra Republicana e Democràcia i Llibertat teñan grupo propio e iso non se fai a cambio de nada. Nós dixémolo, antes e durante a campaña, e mantémonos firmes na nosa postura: nunca pactaremos con partidos que queren romper a unidade de España. O PSOE ten aínda a oportunidade de apostar por un goberno de estabilidade; os socialistas teñen que elixir entre converterse en refén dos radicais e independentistas ou decantarse polo interese xeral dos españois. Mariano Rajoy tendeu a man para un gran acordo que permita formar un Goberno de estabilidade e seguirá traballando, con diálogo, para conseguilo. É o que o noso país necesita para consolidar a recuperación e o único garante da unidade fronte ao chantaxe secesionista.