Boa sintonía

Sintonía e cooperación. Ese pode ser o resumo do encontro que veñen de manter esta semana en Madrid o presidente da Xunta e o presidente do Goberno. E coido que non é un mal resumo a tenor das circunstancias. Nun contexto de axustes hai que ser consecuentes pero, pese a elo, hai que aspirar a que as infraestructuras clave para a vertebración de Galicia e para a súa conexión co resto de España vaian executándose segundo os prazos previstos e mesmo que os sectores estratéxicos da nosa economía conten con respaldo gubernamental, sobre todo, por exemplo, á hora de negociar novos acordos na Unión Europea. E eses compromisos foron ratificados. Ademais, é doado imaxinar que entre Feijoo e Rajoy hai moita e boa sintonía. A verdade é que teñen considerables puntos en común, por orixe e tamén por traxectoria. E non cabe dúbida tampouco de que o presidente do Goberno é un interlocutor extremadamente sensible ás circunstancias e peculiaridades da nosa Comunidade Autónoma. Ó fin, tamén por orixe e traxectoria, ten amplos coñecementos da realidade do noso país, dos seus puntos fortes e fracos, das súas carencias e necesidades. Por todo elo, estou convencido de que Galicia ten un excelente interlocutor na Moncloa e que Alberto Núñez Feijoo tamén está a altura do seu cometido e saberá, sen renunciar a nada, fixar prioridades á hora de reivindicar demandas para Galicia. Ambos deron mostras delo durante o encontro ó que fixen mención. A existencia de entendemento entre institucións é básico para que o barco chegue a un porto seguro. A través da cooperación e a colaboración, claramente é moito máis doado atopar solucións axeitadas para todas as partes implicadas por moi compricadas que resulten as circunstancias. Pero para chegar ó entendemento hai que estar predisposto para elo. E aínda que non se trata agora de reprochar actuacións pasadas, non está de máis lembrar que outrora as circunstancias e as actitudes eran distintas e non redundaron precisamente en beneficio dos galegos. Dando por feito que ben está o que ben acaba; é unha obviedade dicir que tanto Rajoy coma Feijoo xogan no mesmo equipo e, de todos é sabido, que traballar en equipo divide o traballo e multiplica os resultados. En Galicia, a boa xestión efectuada polo equipo que lidera Núñez Feijoo está a dar os resultados agardados e o mesmo acontecerá no Estado.